Joan den martxoaren 6an, Goiuri Jauregia-n ospatu zen emakume kooperatibisten omenaldi ekitaldia, Euskadiko Kooperatiben Goren Kontseilua-k eta Konfekoop-ek antolatuta, “Kooperatiba gehiago, berdintasun gehiago” lelopean. Martxoaren 8ko Emakumeen Nazioarteko Egunaren harira egindako ekitaldian, Euskadiko 50 kooperatiba ezberdinetako emakumeak omendu zituzten.
Kirikiño Ikastolaren izenean, Kontxi Cantera izan zen omendua, gure komunitatean urte luzez egindako ekarpena aitortuz. Emakume talde baten lanari eta konpromisoari lekukoa hartuta, Kontxik euskal dantzen transmisioan eta sustapenean egindako lan isil baina erabakigarria nabarmendu nahi izan zen ekitaldian.
Urte hauetan guztietan, ikasle taldeei laguntzen, dantzetarako jantziak prestatzen eta zaintzen, eta dantza jarduera aurrera ateratzeko behar diren hamaika lanetan aritu da, askotan ikusezina den baina ezinbestekoa den konpromisoarekin. Bere dedikazioari esker, belaunaldi askok euskal dantzak ikasi eta bizi izan dituzte gure ikastolan.
Ekitaldira ikastolako zuzendaria eta omenduaren gertuko bi kide bertaratu ziren, eta Kontxik berak jaso zuen aitortza oholtzara igoz. Giro bero eta hunkigarrian, kooperatibismoaren egunerokoan funtsezkoak diren emakume askoren lana eta konpromisoa jarri ziren balioan.
Gure ikastolatik, zorionik beroenak eman nahi dizkiogu Kontxiri, urte hauetan guztietan egindako lanagatik eta gure komunitateari egindako ekarpenagatik.
